الاثنين، 22 يوليو 2013

حادثة سخيفة,,برجاء القراءة



يوم ١٥ يوليو ٢٠١٣ كنت في سيتي ستارز و كنت بشتري حاجات محتاجه لبنتي من (Mothercare) بعد ماخلصت شراء وانا واقف عند الكاشير دار الحوار الت
الي بين الكاشير و احد العاملات في المكان (في وجود عميلة منتقبه امام الكاشير مباشرة تقوم بانهاء الحساب):
- العاملة: الحمد لله اني عرفت اجي الشغل النهاردة.
- الكاشير: ليه خير !!؟
- العاملة: اصل انا وانا جايه عديت علي يوسف عباس .. والريحة واصلة لحد هناك ..
- الكاشير: ريحة ايه !!
- العاملة: ريحة رابعة .. ريحتهم وحشه اوي انا كان هيغمي علي من صعوبة الريحة ..
هنا تدخلت انا في النقاش ..
- انا: ممكن اطلب من حضرتك طلب !!
- الكاشير: اؤمر يا فندم (وهو بيحاسبني علي الحاجات المشتريها) ..
- انا: نصيحة من اخوك .. بلاش تتكلم في السياسة في مكان شغل .. علشان وجهة نظرك لا تعبر عن وجهة نظر المكان .. وعلشان مش تضايق اي عميل عندكم يختلف معاك.
- العاملة (بدون ما اوجه لها اي كلام): بس والله يافندم ريحتهم صعبة جدا .. (طبعا الافندم شكله ابن ناس وشاري حاجات بشئ وشوياه فاكيد مش معفن زي بتوع رابعه).
- انا: يعني انا ريحتي فايحة اوي كده !!!؟ (كنت لسه معدي من هناك وبصلي بشكل شبه يومي التراويح هناك).
- العاملة: معرفش (بكل قلة ادب بدل ماتنفي ما قلته في جملتي السابقه) .. انا بقولك الي شميته وانا معديه من هناك ..
- انا: طيب ياريت حضرتك ميبقاش فيه كلام في السياسه في مكان عمل (عام) علشان كلامك ده لا يضر صاحب العمل وعلشان لا يعبر عن وجهة نظر المكان.
- العاملة: انا حرة اقول الي انا عاوزه .. مش ذنبي انهم مش نضاف.
- انا: لأ حضرتك مش حره طالما في مكان عمل .. علشان انا ممكن ماشتريش اي حاجه و ارجع كل الحاجات دي واطلب مديرك واطلب اسفه لان حضرتك وجهتي اهانة اكثر من مره ليه ولمصريين ودي قلة ادب مينفعش الكلام ده يحصل ..
- العاملة: انا قليلة الادب !!!؟
- انا: لا ابدا .. انا مقولتش لحضرتك كده .. انا بقول ان الفعل لازم تعرفي انه غير مقبول ان مكان يعبر العاملين فيه عن وجهة نظر سياسية .. ولما اقول لحضرتك والفت انتباهك اكثر من مره وبرضه توجهي اهانة يبقي ده داخل في نطاق قلة الادب في التعامل مع العملاء.
- العاملة (بدون اي مقدمات): انت سافل وواطي ..
- انا: احترمي نفسك .. مهو سهل ارد عليكي .. بس مشكلتي اني مش هعرف ارد ..
- العاملة: والله انت سافل وواطي ..
- انا: انا عاوز المدير .. علشان انت تجاوزتي بزيادة وصوتي بقي عالي جدا ..
- بعض العملاء: معلش يا محترم .. حضرتك معاك اهلك وزوجتك كبر دماغك ..
- انا: دي بتقولي سافل !!!
- العاملة: انا عاوزة الامن حالا (مع ثقتها الكبيرة ان الامن سينصفها من باب العنصرية و الارهاب و التطرف).
- الكاشير (بعد ان لاحظ تعاطف العملاء معايا): ايه هو علشان انت اخوان ومش عاجبك الكلام هتقل ادبك علينا !!!؟ ايه العنصرية والارهاب والتطرف ده ..
- انا: والنبي اركن انت علي جنب بالكلام الي انت مش فاهم فيه ولا حرف ده ..

بعد كلام الكاشير صدمت ان كل العملاء (الهاي كلاس) اتقلبوا وبقوا ضدي لمجرد انه ذكر اني اخوان مع العلم اني مش اخوان :) ..

خلاصة الامر ان المدير جاء لموقع الحادثة و قدمت شكواي له .. لافاجئ برده: حصل خير و من خلفه العاملة تنهال بسيل من الشتايم ..

انا: حصل خير ايه !!؟ انا مش فارق معايا البت الي بقها عمال بيطلع زبالة دي .. انا فارق معايا انت .. انت مدير والمفروض ده يبقي الف باء في تعاملك مع العملاء في انك تفهم العمال بتوعك ان مينفعش يتكلموا في السياسه او يتبنوا موقف غير محايد قد يزعج اي من عملاءك ..

المدير: ياعم كل واحد حر.

هنا فقدت الامل في ان احصل علي اي حق لي ... وطبعا انا علي علم تام بان مدير امن سيتي ستارز لواء امن دولة سابق .. ولن يكون (اكيد) هو المفر و المدافع عن حقي ..

انا تركت المكان ولسان حالي يقول: "حسبي الله ونعم الوكيل" ..

ولفت انتباهي اني تعرضت للارهاب وضاع حقي بسبب عنصرية و تطرف بغيض .. ثم يعودون باتهامنا باننا ارهابيين و متطرفيين .. الارهاب والتطرف لا يحتاج لسلاح او تفجيرات هنا وهناك .. يكفي ان تتطرف او ترهب غيرك بكلمة باطل تضيع به حقه وتضعه في موضع عنصري بغيض ..

اقل ما يمكن ان نتخذه اتجاه مثل هذا المكان: ان نقوم بمقاطعته ومقاطعة منتجاته في مصر ومحاولة ايصال صوتنا لادارته لعلهم يتعظون و يرجعوا الحق لاصحابهم ولعلنا نقضي علي هذه العنصرية البغيضه ..

تحديث ١ (١٦ يوليو الساعه ٢ الظهر):

تم الرد علي من الشركة الام في انجلترا بعد اقل من ساعتين .. والرد بانهم اسفون لما حدث وسيتم تحويل الموضوع بالكامل للوكيل في مصر ومتابعته بصفة شخصيه للتاكد من الوصول لنتيجة اقبلها ..
مرفق صورة من المحادثات التي تمت بيني وبين مندوبه من الشركة الام ..
http://i39.tinypic.com/13zvb5e.png

تحديث ٢ (١٦ يوليو الساعة ١١:٣٠ مساءا):
تم التواصل معايا من خلال ممثل عن مجموعة (الشايع الكويتيه) المسئولة عن ادارة سلسلة محلات مازر كير في الشرق الاوسط .. واخبرني باستياءه مما قرأ وبانه سيتم اتخاذ اللازم ضد هذه الموظفة وانه سيتم اخباري بالنتائج و التحديثات غدا صباحا (١٧ يوليو) وانه اعتذر عن الاتصال في وقت متاخر ولكن الاتصال جاء لتدارك الموقف و التعبير عن كامل اسفهم عما حدث وقد شكرت له حسن وسرعة رد فعلهم واني في انتظار نتيجة ماسيسفر عنه تدخله.

تحديث ٣:
وجدت هذا التصريح علي الصفحة الرسمية للشركة و بانتظار رد فعلهم بخصوص قضيتي ..
https://www.facebook.com/mothercareuk/posts/10151604288339125

تحديث ٤ (١٧ يوليو الساعة ١١:٠٠ صباحا):
تم الاتصال بي الان من مدير الخدمة الهاتفية (Call Center) لمجموعة الشايع وكيل mothercare في الشرق الاوسط واعلمني انه تم اتخاذ اجراء شديد ضد الموظفة وان الCountry Manager هيقابلني لتقديم الاعتذار بنفسه و لاثبات الاجراء الذي تم اتخاذه ضد الموظفين ..

تحديث ٥: (١٧ يوليو الساعه ٣:٣٠ عصرا):
تم الاتصال بي الان من الoperations manager وابدي اسفه مره اخري وطلب مني مقابلتي مساءا بعد الافطار لتناول القهوة معه و تلبية جميع طلباتي و اعلامي بما تم اتخاذه ضد الموظفين المخطئين .. تم الاتفاق علي الميعاد و علي المكان في City Stars بجوار الفرع المشكو في حقه .. علي امل ان اجد اعتذار من الموظفين انفسهم وعقاب يستحقونه وضمان لعدم تكرار مثل تلك المواقف مره اخري ..

تحديث ٦:

قابلت ال operational manager في مصر وبعد الاجتماع معه توصلنا الي الاتي:

- تم ايقاف عمل الموظفين المشاركين في المشكلة لحين انتهاء التحقيقات.
- تم عمل تحقيقات اولية مع الموظفين و جمع لاقوالهم وجميعها تتفق مع رواية العميل.
- تم اتخاذ قرار من الادارة وتعميم علي مجموعة شركات الشايع بعدم الحديث ابدا سواء كان مع العميل او مع موظف اخر عن السياسة او جنسية العميل او الرياضة.
- التحقيقات الجارية للوصول الي العقوبه المثاليه للموظفين وليس لاثبات القصة من عدمها لانه تم اطلاعي علي نتيجة تحقيق مع العمال يوضح صدق روايتي.
- اللجنة التي تم تشكيلها لعمل هذه التحقيقات هي لجنة مشتركة بين
قسم ال HR
و ال Legal department

مطالبي كانت واضحة:
- طرد الكاشير والعاملة من العمل لاني لا اتوقع ان تقبل الشركة باستمرار عمل موظف يقوم بشتم العملاء.
- اعتذار رسمي عما حدث.
- اثبات لما تم اتخاذه من اجراءات وقد وضحت ان الموضوع تعدي شخصي البسيط الي قضية راي عام تدعمني تحتاج اثبات لاسترداد الحق ليوقفوا الحملة.

انطباعي:
الادارة تحاول المماطله في الامر وشعرت بنيتهم عدم انهاء العمل للعاملة خوفا من الاعلام و امكانية عمل حملة اعلامية مستغلين كلمة "الاخوان" لارهابنا.

الادارة طلبت مهلة ٥ ايام لاطلاعي علي التحديثات .. وقبلت بذلك ولكن علي وعد اني لن اخفف حدة الحملة ضدهم حتي يصل لي حقي ..

#mothercare
#
racism


ليست هناك تعليقات:

إرسال تعليق