الجمعة، 5 يوليو 2013

لا تلوم ولاد............الإيه

يجب أن يتعلم أصحاب الحق تنظيم أنفسهم و الأستعداد للدفاع عن النفس,,,,إنتي حيتعلموا؟؟؟؟, كل يوم البلطجية بتصطاد الناس و برضه ميش فايدة؟؟؟؟ اللوم علي الحياة و الداخلية كاللوم علي "سما المصري" إنه أتأخرت علينا ف أمامة صلاة الفجر؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يحدث الآن في مدينة الزقازيق .
Ahmad Gamal Saad-Eddin

في الأول أنا كنت متصوّر إن الموضوع كله خناقة عادية، لكن الوضع دلوقتي في الزقازيق بيتحول إلى حالة انفلات أمني كامل، بلطجية في الشوارع بسلاح أبيض، وخرطوش وسلاح ناري، وفي وجود ضعيف جداً للداخلية..

في نقطة مهم توضيحها لإني بسمع كلام غريب عن إن الإخوان بيكسّروا المحلات، وبيضربوا الناس، وبيقتحموا الكنائس وخلافه، أنا معرفش الحقيقة الكلام دا بييجي منين ! اللي بيحصل دلوقتي هو إن الإخوان بيتفشخوا في الشوارع بالمعنى الحرفي للكلمة. اللي بيحصل دلوقتي مجزرة..

-الموضوع بدأ بخناقة عند المحافظة، مسيرة للإخوان، والموضوع تطوّر لإشتباك عادي بالطوب، لحد دلوقتي الدنيا مفيهاش أي مشكلة، ودا بيحصل تقريباً في كل مظاهرة اليومين دول
-الإخوان مكانش باين عليهم أي نية للإشتباك أصلاً، شوية ناس، اغلبهم من سن كبير أصلاً، وستات مخمّرة، وعيال في إعدادي.. الإخوان دماغهم متربسه وأغبى خلق الله، لكني فعلاً مشفتش، ولا غيري شاف إن حد منهم معاه سلاح غير شوية طوب..
-الاشتباكات استمرت لحد ما وصلت 3 مدرعات أم مركزي، حجزت بين الطرفين، وضربت قنابل أمن مركزي، ورصاصتين حي في الهوا، وعملت كردون حوالين الإخوان، والاشتباكات وقفت لفترة.
-الفكرة بس في إن الناس حوالين المدرّعة كانت شايله مولوتوف، وسلاح أبيض، وفي ناس طلعت فوق المدرّعة وتبادلوا أحاديثاً وديّة مع الضباط..
-مع الوقت، في حاجة كدا زي خبرة الاشتباكات بتيجي من كتر ما الواحد بيشوف الأنماط اللي في الشارع، يعني أنا قادر كويّس أميز بين المتظاهر اللي من منطقة شعبية، حتى لو كان شايل سلاح، وبين البلطجي بشكل واضح وصريح، حتى لو التاني دا مش شايل سلاح
-مشّوا الستات من الكردون.. وبعدها بدأت المعجنة..
-اللي حصل إن الكردون دا تم اختراقه، وبدأ ضرب الاخوان بشكل غير طبيعي.. مبحبش أستخدم مصطلحات كبيرة، لكن دي مذبحة بكل المعاني
-الضرب كان بيحصل بالخرطوش، وبالسلاح الأبيض، مطاوي وسنج وسيوف وخلافه، وبالمولوتوف..
في واحد من الإخوان اتمسك، واتضرب بالمولوتوف، يعني اترمت عليه العبوّات، مباشرة..
-في إخوان رموا نفسهم في البحر، عشان يهربوا من اللي بيحصل، واحد منهم عام في الميّة، لحد ما وصل منور بيت واحد صاحبي. ومن هناك شافه وهو بيتمسك من منور البيت، والناس ملمومة عليه وبيحطّوه في عربية كارّو، وسمع بودانه واحد بيقول: "محدش يموته، هنعذّبه الأول"..
-الإخوان دلوقتي محاصرين في مسجد النصر اللي على البحر، جنب (تي إي داتا).. واقف على الباب شوية ضباط، والناس حواليهم بتهتف لهم
- أعتقد إن المحطّة هي منطقة تجمّع البلطجية دلوقتي.. ومن هناك بيتحركوا على موتوسيكلات إلى أماكن الضرب..
-قناة الحياة دلوقتي بتتكلم عن إن الإخوان ماشيين بيكسّروا في العربيات في المحطّة، ودا كذب صريح..
 

ليست هناك تعليقات:

إرسال تعليق