الصيت ولا الغني

عبدالله الشريف
أتذكر مرة مدرس الدين دخل علينا وكان شديد وصارم جداً
وشكله كان ناوى على نية وسأل سؤال
إيه هى خسائر المسلمين فى غزوة أحد ؟
الأول ماعرفش ( خليك واقف ) اللى بعده وهكذا
لحد ما جه الدور عليا ولسه هقول مش عارف
لقيته بيقولى لا استنى انت يا شيخ خليك ختامها مسك
( اه وربنا كانوا بيقولولى شيخ من رابعة ابتدائى ,
قرآن فى الإذاعة ونشاط دينى وكده )
,,
المهم الفصل كله ماعرفش
سابهم واقفين وراح قاعد ومتنك أوى وقعد يشتم وراح باصصلى
: قولهم يا ابنى قولهم
فأنا بقى من شدة الكسفة وتكتيفة لسانى إنفجرت فى البكاء
قام بسرعة وجالى جرى وقعد يطبطب عليا وقالهم
شوفتوا يا شوية بقر ماعرفش يمسك نفسه لما افتكر ان فيه
سبعين شهيد ده غير كسر رباعية الرسول صلى الله عليه وسلم
سقفولوه , سقفولوووووووووووووووووووووه