انهاردة انا واختي وصلنا مصر الصبح، اول ما وصلنا المطار طلبت تاكسي من Uber وصلنا اولا في 10 دقايق بالظبط، وكان حسابه من المطار لأكتوبر 150 جنيه، مش 250 جنيه زي ما السواقين اللي في المطار بيطلبوا.
طبعا العادي اللي هو اول ما وصلنا مليون سواق جايين يسالونا اذا عايزين تاكسي واحنا بنقوللهم شكرا احنا مستنيين حد، لما طلعنا من المطار كان فيه اكتر من عربية واقفين ف اتصلت بسواق Uber اساله هو واقف فين بالظبط وايه لون العربية، كان واقف جمبي اتنين سواقين راميين ودانهم معايا، واول ما قفلت سمعت واحد منهم بيقول للتاني: هي بتكلم Uber او Careem .
طبعا نفضنا انا واختي ومشينا، نزلنا ال parking مكان ما كان واقف السواق مستني، وطبعا لما شافنا وعشان معانا شنط جالنا جري، وكان حرفيا بيجري عشان ياخد منا الشنط، اول ما وصل واخد مننا الشنط ومتجهين عالعربية، لقينا كل سواقين التاكسي اللي في المطار بيلموا بعض وينادوا على بعض: واحد تاني من Uber اهووووو، تعالوا تعالوا واحد من Uber اهوووو، وكانهم ماسكين تاجر مخدرات !! بنبص ورانا انا واختي لقينا كمية بشر ماشية ورانا مرعبة!!
المهم وصلنا العربية لقيت واحد من السواقين جاي بيقول لسواق Uber رخصتك !! قبل ما هو يرد انا كنت سالته: انت مين؟ وايه وظيفتك؟! قاللي انا امين شرطة !! قلتله وريني بطاقتك !! لقيته بينادي على واحد جاي من بعيد بيقولله تعالى يا باشا مسكنا واحد تاني اهو !!
لما جه "الباشا" اللي كان مستنيه، شكله عربجي ومبرشم اصلا !! بيقولله انت ممنوع تحمل في ملاكي، سواق Uber المؤدب قالله يافندم انا معايا اذن شغل وورقي سليم، قالله وريني ورقك ورخصك!! سواق Uber كان بيطلع الورق وهو متوتر شوية، ف انا رايحة عند الي واقف ده لانه لابس مدني مش ميري وشكله مش مريح، سالته: انت بتشتغل ايه؟! وصدمني الرد: انا ظابط في مباحث المطار !! انا كان شكلي كده 😱 قلت في نفسي: ايه الظابط العرة ده !! المهم برضه طلبت منه بطاقته عشان من حقي اتاكد انه الكائن ده ظابط!! ف قاللي بس انا مطلبتش منك ورق، انا طلبت منه هو!! قلتله وانا اللي مكلماه وقلتله ييجي ياخدني فوريني بطاقتك!! سابني وراح يزعق للسواق ويقولله: خلص انا مش نايم من امبارح !! قلتله حتى لو مش نايم والمفروض ده شغلك ف اعمله !!
وكل ده والسواقين ملمومين حوالينا، قعد يسال السواق شوية وهو بيرد بكل ادب واخلاق، في الاخر قالله انا على فكرة حايشهم عنك انا لو سبتهم يضربوك ويكسرولك العربية!!
انا بصراحة اتفاجئت انه البلد بدل ما هي ماشية بقانون ماشية بالبلطجة!! مقدرتش اسكت وقلتله: يعني اللي انت بتقوله ده حاجة كويسة يعني؟!! اللي واقفين وراك دول كلهم نصابين ومبرشمين ومحششين ومتحرشين، ولو كانوا نضاف وبيراعوا ربنا مكنتش الناس سابتهم وكلمت Uber !! نطلي واحد منهم مدافعا عن اهل مهنته الشرفاء: يعني يا ابلة بتوع اوووباار دول كلهم محترمين يعني؟؟
قلتله: اه كلهم محترمين وولاد الناس، الدور بئا عليكم انتم !! ضحكلي ضحكة سمجة كان نفسي اديله بالشنطة اللي في ايدي على وشه !!
جه "الباشا" المزور وقاللي بعد اذنك احنا هنروح مكتب المرور 3 دقايق ونيجي!! بصيت للسواق اللي طمني وقاللي متقلقيش مفيش حاجة، واداني مفتاح العربية وقاللي اقعدي فيها انتي واختك واقفلوا على نفسكوا من جوا !! وراح مع تتار الهمج. ورجعلنا بعد شوية ومشينا، وهو يا حرام طول الطريق يعتذر عن المهزلة اللي حصلت ويحاول يبررلي الموقف اللي هو اصلا مش ذنبه!!
لما وصلت قلتله هصورك وانزل اللي حصل عال Facebook قاللي بلاش اصل شكلي متبهدل شوية، انا هبعتلك صورة حلوة 😃 واكتشفت انه كان موظف في فندق Grand Hayat وخريج سياحة وفنادق.
ليست هناك تعليقات:
إرسال تعليق