كعادة انصاف المتعلمين بل و حاملى الدرجات العلى من المصريين ، قال الشاب الذى يرتدى البدله الانيقه و رباط العنق و يزين صدره على اليسار شريحه من النيكل اللامع تحمل اسمه و وظيفته بحروف انجليزيه (فلان الفلانى مدير الاغذيه و المشروبات) :" احنا الفراعنه اصحاب اعظم حضاره ما ينفعش شويه بدو جايين من الصحرا يعلمونا نعيش ازاى ؟؟"...
اعتدلت قليلاً بصعوبه لكونى كنت مستلقياً فى استرخاء على كرسي هزاز من القماش على شاطئ هذا المنتجع الساحر "الجونه" -محاولة الاعتدال فى هذا الكرسي فى حد ذاتها عذاب ما بعده عذاب - بينما يلهوا اطفالى فى المياه الزرقاء الصافيه و تناولت منه فنجان القهوه الذى كان قد جلبه بنفسه بناءًا على طلبي "او تهديدي" بعد ان رفض النادل احضار قهوه تركى على الشاطئ !!
و اقتنصت نظره سريعه على اسمه المدون على صدره ثم قلت له بعد ان دعوته للجلوس :
" انت خريج ايه يا مستر ريمون ؟" -هم عادة يستحسنون لفظ مستر و يضايقهم ان تكنيهم ب أستاذ !-
-ليه حضرتك ؟
- لا أبداً ، بس سنك صغير و البوزيشن (برضه كلمة بوزيشن دى بتعجبهم قوى غير لما تقول لهم مركز !!) بتاعك يعنى عالى فواضح ان حضرتك معاك سي ڤى هايل ( طبعاً انت فهمت دلوقتى انا رايح على فين !!)
- انا بكالوريوس تجاره
- آه ، عظيم ، يعنى حضرتك قارى تاريخ كويس ( طبعاً مفيش علاقه بين تجاره و تاريخ بس انا عارف انه هايقول لى طبعاً !!)
- طبعاً (عيييييييب مش قولت لك!!)
- طيب ، يا مستر ريمون ، يعنى انت قريت ان الفراعنه كانوا بيتجوزوا إخواتهم و ساعات بناتهم و فى بعض الاحيان بيوصل الحال انهم بيتجوزوا امهاتهم ، مش كده ؟؟
- أه (ممتقع الوجه)
-و طبعاً بما انك قريت تاريخ فانت عارف هما كانوا بيعملوا كده ليه ؟؟
- يعنى ، بس ليه ؟ ( هو طبعاً حمار و مش عارف و لا حاجه و عمر امه ما فتح كتاب و قرا تاريخ مصر الفرعونيه و آخر معلوماته جدك القديم !!!)
- انا أقول لك يا سيدى ، عشان البهوات الفراعنه كانوا بيحتقروا شعبهم اللى هو سيادتك بتفتخر كونك منهم -اه والله قولتها له كده- الى درجة انه كان بيستعر من عرقهم و جيناتهم و بالتالى كانوا بيستنكفوا انهم يلوثوا نسلهم بدم شعبهم فكانوا بيتجوزوا بعض للمحافظه على طهارة النسل من "دنس" دم شعب العبييد
مش بس كده ، ده لما كان الفرعون من دول تحلَّو فى عينه نتايه -أه و الله قولتهاله كده كناية عن بهيميتها- مصريه و ينام معاها و تحبل و تجيب عيل من صلبه و ما يبقاش عنده ولاد خالص من نسله ، كان برضه بيتبرى منه و ما بيسمحلوش يتولى العرش من بعده و يخلى واحده من بناته تعمل راجل و تتولى العرش و لا إنه يسمح لإبنه من نسل الشعب "العبيد" يتولى العرش !!!!(حتشبسوت) شفت أد إيه هما كانوا بيحتقروا الشعب ده ؟؟؟!! و مع ذلك ييجى واحد زى حضرتك متعلم و بيه ملو هدومه و يقول لى انا فخور بإن اجدادى فراعنه !!!
- نظر لى نظره تنم عن حيره شديده و إحباط مطلق فيما كان عدد غير قليل من الموظفين و بعض السائحين المصريين قد تحلقوا حولنا ( لأن من يعرفنى عن قرب يعلم أن أسوأ خصالى على الإطلاق هو إرتفاع صوتى و جهوريته و هو أمر لم يفلح معه علاج برغم حرصى على ذلك تأدباً بالقرآن "و أغضض من صوتك") انبهاراً على ما يبدوا بغرابة الطرح ثم قام مستأذناً فقلت له : لا استنى بس دقيقه واحده و اسمع دى
- انت طبعاً رحت الاقصر و اسوان و ابيدوس و كده صح ؟
- رد فى حماس (و الغريب ان الأخرين جميعاً ردوا معه) آه طبعاً !!
- عظيم ، فاكر شفت ايه ؟
- أه ، معبد الكرنك و وادى الملوك و ... قاطعته
- تمام تمام ، وادى الملوك و الملكات و النبلاء و ووو الخ ، تخيل يا مستر ريمون ، شعب بحاله و دوله بحالها ما بتعملش حاجه غير مقبرة البيه الفرعون و و مقبرة الهانم بتاعته ... اديك سافرت قد ما سافرت و شوفت قد ما شوفت فى مصر من عهد الفراعنه ، عمركش شوفت مستشفى فرعونى ؟ مدرسه فرعونى ؟ عمركش شوفت أى أثر مصرى اتعمل عشان يخدم الشعب "الفرعونى العظيم" ؟؟؟!!!يا راجل ده المصريين ما عرفوش المراحيض الا لما احتلهم الرومان !!!! حتى المعابد الضخمه الرهيبه ما كانش مسموح للمصريين من الشعب بدخولها ابداً سوي دخول الحوش الخارجى "اسم الدلع بتاعه الفناء المكشوف" بس هو الحقيقه حوش !! و حتى ده كانوا بيسمحوا لهم يدخلوه بس عشان يتنيلوا يجيبوا القرابين و يدبحوها فيلهفها البهوات الكهنه !!! انما المعبد نفسه ، أبداً بعينهم !!
هو ده بقى يا سيدى النعيم اللى كان الشعب "الفرعونى" عايش فيه ، و حضرتك و غيرك فخورييييين بيه قووووى و فالقين دماغنا ، فراعنه فراعنه فراعنه
تعالى بقى نشوف الجماعه البدو بتوع الصحرا عملوا ايه :
روح كده اتمشى فى شارع المعز و هتلاقى مساجد هائله و عظيمه ، انما كان مسموح للشعب يدخل كل متر فيها و مافيهاش تدخل فين و ما تدخلش فين ، بس كده ؟ لأ ، و مع المساجد المعموله لخدمة "الشعب" كمان مستشفيات "بيمارستان" و مدارس ، آه و الله مدارس و كمان كتاتيب و اسبله "جمع سبيل" عشان الشعب "الفرعونى" يطفح ميه ساقعه !! و أقولك كمان ، طيب يا عم و كمان حمامات عشان الشعب المعفن اللى ريحته تقرف يستحمى و ينضف !!!
أقول لك كمان قادة جيش عمرو بن العاص كتبوا ايه على "ريحة" المصريين القبط دى بالذات ؟؟!!
و لا بلاش ، عندكم هنا فى الجونه مكتبه عامه عظيمه انا دخلتها امبارح ، روح هناك هتلاقى امينة المكتبه بنت ظريفه و مهذبه اسمها تريزه، قول لها ادينى كتاب " تاريخ مصر منذ الفتح العربى و حتى الغزو العثمانى" للاستاذ عبد الرحمن الرافعى و افتح صفحة ٣٩ و اقرا و استمتع !!!!
نرجع بقى لشارع المعز و فى وسط الشارع كده ها تلاقى مبنى اسمه ماريستان السلطان ناصر بن قلاوون كان معمول عشان يستضيف المرضى النفسيين !!!! أه و الله المرض النفسيين ،، اللى الاوروبيين كانوا بيعتبروهم شؤم بإعتبار ان الشيطان قد تلبسهم !! شفت بقى البدو بتوع الصحرا متحضرين قد ايه ؟؟؟
و لو لسه دماغك ما سخنتش ابقى خد تاكسي و اوصل باب الخلق و ادخل متحف الفن الاسلامى و شوف يعنى ايه حضاره انسانيه ، و يعنى ايه تكون المعروضات مشكاوات رائعه و مزولات مبهره و ادوات طب و فلك و هندسه و عماره و اثاث و قارن ده بمعروضات المتحف "المصرى" اللى كله تماثيل للفراعنه و اثاث "جنائزى" و مقتنيات تخص الملوك فقط و مومياوات و أقنعه و عجلات حربيه و آلهه !!!!!!!
يا استاذ ، و اسمح لى أقول لك يا استاذ ريمون ، مش مستر ريمون، العرب المسلمين اللى انت بتقول عليهم البدو بتوع الصحرا أعطوا هذه الارض أعظم حضاره فى تاريخها و اخرجوها من عبوديه ابدعت اثاراً عظيمه تخلد عبودية الفرد الى حريه و حضاره ابدعت أثاراً أعظم تخلد انسانية البشر و رفاهية الشعوب و أى عاقل منصف حر متخلص من عبوديته و حقده سيقف و يهتف بحماس انا فخور بحضارتى العربيه الاسلاميه و متنصل و متبرأ من فرعونيتى ... و لولا انك مسيحى لا تؤمن بكتاب الله لأتيت لك من كتاب الله بعشرات الأيات التى تلعن الفراعنه و تذمهم و تقدح فى خصالهم بما لا يسمح لمسلم ان يفتخر بمن لعنهم الله .....
- شكراً يا استاذ احمد ، على الله تكون القهوه عجبتك !! و انسل مغادراً مطأطأ الرأس بينما مال احد المصريين المتحلقين حولنا و قبل رأسي .
ليست هناك تعليقات:
إرسال تعليق