جمهورية الموت ..
أسامه يعقوب شاب صعيدى مصرى قبطى .. طلع عين أم اللى خلفوه
فى بلدنا عشان ياكل عيش .. وأشتغل فى كل حاجه وششقى وعرق ..
سنين طويلة .. ربنا رزقه بسبب تعبه وشقااه .. وكرمه ربنا وفتح
من مده قريبة تلاجة لحفظ المجمدات وجايب عربية ربع نقل بيوزع
بيها اللحوم والمنتجات الأخرى على العملاء بتوعه ..
نزلت عليه لجنه من المحافظة من كام يوم .. عملوله محضر
واخدوا بضاعه ب60 ألف جنيه للكشف عليها وركنوها فى الشمس
ساعات لحد ما فسدت .. وشمعوله المكان ...
التلاجه فيها بضاعه ب مليون جنيه .. بتاعت ناس ساحبها
أسامه منهم على الحساب .. والتلاجه اتشمعت ..
وعليه التزامات وعليه بيت بيصرف عليه ..
أسامه عنده 32 سنه راح للمحافظ وراح لطوب الأرض محدش اهتم
نفسيته ساءت والضغوط زادت ..
كلم صاحبه مينا عشان يشتكيله من ام الدنيا وقعدوا على قهوة
قريبة من مزلقان سكة حديد بسوهاج
وهو قاعد كلم مراته وقلها بوسيلى الولاد ومتفتحيش الفيسبوك النهارده
وانا هتأخر وهاجى بالليل ..
صوت قطر جاى من بعيد .. أسامه يقول لمينا ..
هى الدنيا حلوه ..؟
مينا يقوله أيوه
يسيب مينا ويجرى ناحية القطر اللى قرب .. ومينا يجرى وراه
ويشده ويضرب مينا .. ويرمى أسامه نفسه تحت القطر ...
مااااااااااااااااااااااااااااااااااات أسامه ...
--------------------------------------------------------------------------
النهارده كنت بعزى فيه فى كنيسة مارى جرجس بسوهاج ..
كل اللى موجودين مسلمين ومسيحين بيبكوا وبيدعوا عالظالم ..
واللى كان السبب ...
أسامه مامتشي فى مركب .. أسامه مات تحت قطر هربان من غول الدولة
ليست هناك تعليقات:
إرسال تعليق