اخبار سريعة من شباب المهجر

Mohamed Ata

لو عايز تطمن على حال البلد النهاردة..

- الشروق: "قناة السويس تطلب من البنوك تمويلا بقيمة 400 مليون دولار" ... تقريبا السفن اللي بتعدي في القناة مابتعطيناش حاجة وبتعملنا باي

- وروسيا اليوم: "حظر دخول البطاطس المصرية الى الأسواق الروسية لإصابتها والعثور بداخلها على حشرة فراشة البطاطس" ... احسن وفرت هناكلها احنا وهنعملها صينية بطاطس بالفراشة المفرومة في الفرن

- والسعودية أعلنت انها هتبقى شريك في الصندوق "السيادي" المصري ... السعودية شقطانا من جامعة الدول
- وقرار جمهوري بالموافقة على قرض بـ 26 مليون دينار كويتي ... فاضل كده قرضين ويبقى أخدنا قروض أكتر من شعر دقن الفنان سمير الاسكندراني

- وطلب إحاطة لأخد الحكومة قرض أجنبي ب 1.8 مليار جنيه تحت بند إنشاء 3 صالات مغطاة بشرم الشيخ والأقصر والغردقة على الرغم من وجود 3 صالات مغطاة عالمية في نفس الأماكن ... ده التلميذ اللي كان بيضحك على أهله ويقولهم رايح الدرس ومكنش بيروح وبيخنصر الفلوس يروح يلعب بيها بلايستيشن بعد ما كبر وبقى مسؤول

- والبرلمان: "يجب على الحكومة حجب لعبة الحوت الأزرق.. والحكومة ترد: الاتصالات لا تتدخل في الحجب" ... احنا نطلع إشاعة ان لعبة الحوت الأزرق بتنزل أخبار معارضة للريس وهنلاقيهم بيجروا فوريرة يحجبوها وأي لعبة على شكل سمكة

- ووزير الكهرباء: "ببقى متضايق وأنا برفع الأسعار" ... بيكتب البوست وبيعمل لنفسه ريأكشن "غاضب"

- ووزير المالية: "الدين العام تضاعف 5 مرات في آخر 5 سنوات وسيواصل الارتفاع" ... تحس كده انه بيقول المصيبة وهو فخور ومنشكح ... واضح ان سيات وزير المالية فرفوش عكس زميله بتاع الكهربا، وبيكتب البوست وبيعمل لنفسه ريأكشن "haha" ... الوزير الفرفوش رزق

- وصور في حفل تجمع بين طنطاوي وجمال وعلاء ... ومبارك ينشر صورة له في عيد ميلاده ... تقول الأسطورة.. سيظهر الدجال ثم تخرج الدابة ثم يموت مبارك ثم تقوم الساعة

- ووزير التعليم: نحن نقوم ب "قفزة الضفدعة" في عملية تطوير التعليم ... كده عملنا قفزة الضفدعة.. فاضلنا قفزة الأرنب وقفزة الكنغر ويبقى عملنا قفزة المزرعة السعيدة

بس والبلد بخير وزي الفل
يوميات_المزرعة_السعيدة