معضلة:
إزاي في وسط كل السواد اللي احنا فيه ده وكل الظلم اللي هاجم علينا من كل
ناحية تعرف تلفت نظر الناس ان فيه 68 شاب اتعذبوا واتبهدلوا في قسم
الأزبكية وفي أبو زعبل، وانهم واخدين حكم سنتين سجن "عشان يكملوا بيهم
العدد" زي ما قال واحد من الضباط وهو بيقبض على بعضهم من على قهوة في
السيدة زينب؟ ازاي تحكي للناس عن أحمد السيد اللي كان بيغنيلهم "حبيبتي من
ضفايرها طل القمر" في عربية الترحيلات؟ تعرف تقول -بصوت عالي مش في سرك-
لأم معتقل واخد حكم سنتين سجن"ما تزعليش يا أم فلان، احمدي ربنا،
حالنا أحسن من غيرنا، ده فيه شباب واخدين إعدام."؟ تعرف تقول لها "حاسس
بيكي؟". تعرف تقول لها "ان شاء الله خير" وانت مصدق ده فعلا؟ مجموعة
الأزبكية جلسة الاستئناف على الحكم بتاعهم يوم الحد الجاي وبعديهم بكام يوم
مجموعة المعادي اللي برضه واخدين سنتين وبعدهم بكام يوم طلبة الأزهر اللي
منهم أسماء حمدي اللي واخدين 5 سنين سجن. وفيه 21 بني آدم في المجموعة اللي
اتقبض عليها في ذكرى الثورة مضربين عن الطعام بسبب سوء المعاملة في معسكر
الامن المركزي بالكيلو عشرة ونص وبرضه جلستهم الحد. ويوم الاتنين بقى جلسة
مجموعة عابدين.
كل ده ولسه فيه آلاف ما بنسمعش عنهم ولا نعرف نوصل لهم ونوصل حكاياتهم. هو امتى اللي بيقمعونا حيتعلموا ان القمع والظلم ما بيولدوش إلا الغضب؟
كل ده ولسه فيه آلاف ما بنسمعش عنهم ولا نعرف نوصل لهم ونوصل حكاياتهم. هو امتى اللي بيقمعونا حيتعلموا ان القمع والظلم ما بيولدوش إلا الغضب؟
ليست هناك تعليقات:
إرسال تعليق