=======================
في أوائل التسعينات أيام الشباب و الحماس و الذكاء ( قبل ما ابقي كسول و اهاجر و اسيب المخروبة !! ) فكرنا انا و اتنين أصحابي نعمل أي حاجه نجيب بيها مصاريفنا في الصيف ... جمعنا قرشين و رحنا علي مصنع فاتح جديد و اسعاره رخيصه بيعمل ملابس قطنية ( فانلات داخليه ، تيشرتات بحر و هكذا ) .. و جبنا شوية حاجات تناسب الصيف ... أخدنا البضاعه و طلعنا علي "روكسي" شارع "إبراهيم اللقاني" قولنا نقف زي مئات البياعين اللي واقفين علي الرصيف في الشارع ... طبعا الرصيف مفيهوش خرم ابره تقف ، فاروحنا بدري شويه قبل الزحمه و ركنا العربيه قدام "قويدر" و طلعنا البضاعة و فردناها علي العربيه و يا مسهل الحال يا رب ... ارزقنا يا رزاق ... أبسطها يا باسط .... في خلال دقيقتين بالضبط ... 120 ثانيه كانت العربيه متحوطه بخمسة بلطجيه ... و بدون أي كلام و بكل ذوق و أدب شالو البضاعة و رموها جوه العربيه ... و بلهجة حازمة و باختصار شديد قال كبيرهم :
- لم الحاجه دي يا بابا و متقوفقش الوقفة دي تاني
- ليه كده يا كابتشن ... احنا واقفين في الشارع ... و الشارع مش ملك حد
- لا يا حبيبي الشارع له أصحاب .. و متكترش في الكلام علشان متتكسرش انت و العربيه و البضاعه .
و إيثارا للسلامه خلعنا بالبضاعه و العربيه و بنفسنا
اللي عرفته بعد كده أن البياعين اللي ماليين منطقة روكسي" و "إبراهيم اللقاني" دوول مش واقفين كده عبثا أو بلطجة ... إطلاقا ... المسألة منظمه جدا و كل بياع له فرشة ليها أرضيه محدده بيحددها زعيم المافيا اللي بتدير العمليه ...و زعيم المافيا ده بدوره بيدفع نسبه محدده للواء في أمن الدوله مقابل توفير الحماية و الاستقرار و بديهي طبعا ان اللواء ده مش بيقسم مع زمايله اللواءات ... لأن زمايله كل واحد منهم واقف برضو علي ثغر من ثغور الوطن بيعمل منه سبوبة و كله بيخدم علي كله
مافيا التهريب لا تختلف عن أي مافيا سوي في أنها أكبر و اسمن ... طلعة مركب واحده بتعملها كذا مليون ... برضوا لو انت متخيل أن ال30 الف جنيه ( متوسط ) بتدخل جيب صاحب المركب لوحده و أن صاحب المركب ده بيشتغل لوحده هو و رجالته من غير حمايه و غطاء من الناس اللي فوق .. تبقي عبيط ... فكر كده شويه في الموضوع ... التعارف و الاتفاقات و الترتيبات و تسليم الفلوس و الضمانات و تجميع الناس للركوب و و و ... و كل ده بيتم كده ... في بلد محكومه بالحديد و النار من غير ما مخبر يشم خبر ؟؟؟؟؟؟؟؟؟!!!!!!!!!! مستحييييل
لو انت مش مقتنع بالتحليل ده ... أسأل نفسك .. أزاي قيادات الجيش و الداخليه وقفوا 30 سنه يتفرجوا علي فساد رجالة الحزب الوطني و تخصيص الأراضي و العمولات و بيع القطاع العام و المليارات اللي انتهبت من البلد و هما واقفين شايلين السلاح و بيحموهم .. و بياخدوا مرتباتهم و بس ... لو انت مصدق كده يبقي لامواخذة احسنلك ترمي دماغك في البلاعه ... ده المكان المناسب ليها .
باختصار شديد يا عزيزي المواطن المسكين كل مافيا في مصر وراها لواء جيش أو داخليه أو مخابرات بيوفر لها الحمايه و الاستقرار و ده سر أستقرار نظام مبارك 30 سنه بدون اي محاوله لإزاحتة رغم فشله داخليا و سخط الناس ضدة ... لأن كل الاجهزه الأمنيه اللي كان ممكن تهدده .. قياداتها كانت متزبطه .. بتآكل لحمنا و بتشرب دم عيالنا .. جيش ، شرطه ، مخابرات ، قضاء
Ehab Hefnawy
1 hr • London, United Kingdom
ليست هناك تعليقات:
إرسال تعليق