محاورة سلفية صوفية للأستاذ احمد عبدالراضي

• 
  
• 

  Reda Helal لخص أبن خلدون مشكلة الصوفية في تجربته الشخصية بقوله:"كنت أكره الصوفية,ولكني ألآن أحترمهم و أحبهم,,و قد وجدت أنني كنت أكرههم لكثرة المتنطعين بينهم"",,,,, هي دي المشكلة للجميع وليس الصوفية فقط,الا وهي مسؤلية تطهير البيت من الداخل حتي لا تتشوه الصورة بمجملها....... رضا هلال

  Write a comment...

  

  ‎أحمد عبد الراضي‎

  <<حوار مع صديقي السلفي>> {الجزء 1}
  
  • الصوفية ديه ابتداع وخرافات وخزعبلات , والمتصوفين بيشركوا شرك أصغر وأكبر.
  
  ◘ أممممممممم , طيب والإمام القشيري والنووي, وتقي الدين السبكي وابنه تاج الدين السبكي، والحافظ جلال الدين السيوطي، والشيخ أحمد الدردير والناس الحلوين دول نظامهم ايه ؟
  
  • لا .. ما دول متصوفين زمان ، أصل تصوف زمان كان على كتاب الله وسنة رسوله ، وتصوف دلوقتي كله خرافات وخزعبلات وكل المتصوفين اللي جُمْ بعد العلماء دول مبتدعين.
  
  ◘ طيب ما فيه من العصر الحديث الشيخ صالح الجعفري الشيخ الشعراوي والشيخ البوطي والشيخ كشك والحبيب علي الجفري والإمام علوي المالكي والحبيب عمر بن حفيظ والشيخ جاد الحق والشيخ عبد الحليم محمود والشيخ علي جمعة والشيخ أسامة السيد وغيرهم كتير ... دول كلهم محسوبين على التصوف ؟
  
  • مين قالك ان الشيخ كشك صوفي ؟
  
  ◘ يووووووووه ، طيب اعتبره مش صوفي .. ايه رأيك في الباقيين ؟؟ مبتدعين ولا ايه نظامهم؟
  
  • على فكرة هما بيعملوا بدع كتير وخزعبلات.
  
  ◘ أيوه بقى .. زي ايه ؟ ويا ريت تكلمني عن اللي كلمتك عليهم دول.
  
  • عندك علي جمعة مثلاً قال ان النقاب فرض قبل المنصب وبعد المنصب قال انه بدعة.
  
  ◘ أحيــــــــــــــــه , يا ابني متكلمنيش عن فتاوى .. كلمني عن البدع اللي انت شوفتها.
  
  • يعني انت شايف ان كل المتصوفين بتوع دلوقتي كويسين ؟
  
  ◘ بص ,, فيه كثير جداً ممن يدعون التصوف ما هم إلا دخلاء عليه وليس لهم علاقة بالتصوف ، زي اللي بيطوفوا حوالين القبور وبيسجدولها دول ليسوا من التصوف في شيء.
  
  • ما هو ده اللي أنا أقصده بانه خزعبلات وخرافات.
  
  ◘ انت كده اتهمت التصوف بالخزعبلات والخرافات .. المفروض تنقد الخزعبلات والخرافات مش تنقد التصوف لأن التصوف من كل هؤلاء برااااء.
  
  • بس برضه المتصوفين بيعملوا حاجات فيها شرك.
  
  ◘ المتصوفين الحق؟؟؟ .. بيعملوا ايه بقى؟
  
  • بيسجدوا للقبور وبيطوفوا حواليها.
  
  ◘ يا ابني دول مش متصوفين ، دول دخلاء على التصوف ..
  
  • على فكرة خلينا واقعيين , مفيش من المتصوفين بتوع العصر الحالي بيمشوا على كتاب الله وسنة رسوله ومبيبتدعوش.
  
  ◘ ازاي ؟؟ أمال المشايخ اللي قلتلك على أساميهم فوق ؟؟
  
  • دول استثناءات.
  
  ◘ طيب خلاص ماشي .. احنا نتفق ان التصوف حلو لكن اللي سوء صورته هما المنتمين ليه، ايه رأيك؟
  
  • مقدرش أقول كده لأن الأغلبية مش كويسين.
  
  ◘ يا حبيبي احنا بنحكم على مضمون مش على أتباع.
  
  • لا طبعاً ,, الشيء بيتعرف من أتباعه.
  
  ◘ لا إله إلا الله .. طيب ماشي هسألك سؤال.
  
  • اسأل.
  
  ◘ هو الإسلام حلو ولا وحش؟
  
  • ايه السؤال الغبي ده ؟!! أكيد هو الدين الحق وأعظم ما في الوجود.
  
  ◘ تمام .. فلنفترض ان ناس راحوا قطعوا ودان خلق الله وقعدوا يقتلوا في اللي رايح واللي جاي بحجة انهم كفار. ايه رأيك في دول؟
  
  • دول مذنبين طبعاً , وبيسيئوا للإسلام.
  
  ◘ تمام زي الفل , طيب لما حد يطلع ويقول ان الاسلام ده دين إرهابي علشان الناس المسلمين دول قتلوا ودمروا .. ايه رأيك في دول؟
  
  • يا ابني ما دول لا يمثلون الإسلام من الأساس.
  
  ◘كذلك التصوف .. لأن المتصوفين التانيين دول لا يمثلون التصوف. :)
  
  • على فكرة فيه فارق في التشبيه ..
  
  ◘ لا يا راجل ؟؟ .. خلاص ماشي جزاكم الله خيراً .. السلام عليكم.
  
  • وعليكم السلام ورحمة الله وبركاته .. وربنا يهديك.
  
  ◘ آمين :D :D
  
  #سلفية #صوفية