العباسية كلها علي الفيس بوك
يا كل عيل... حِلِم يبقى ظابط
وأمه دعيتله... وربه استجاب
ولابس دلوقتي ميري... وحاطط
نجوم فوق كتافه... وسلاح فـ الجراب
فكر كويس
وبصِّلنا تاني... وشوف احنا مين
احنا اللي لما لبست البدلة... فرحنا عشانك
ويوم التخرج رقصنا فـ حفلة
عملوها ليك الأفاضل جيرانك
واحنا اللي بينا... لو كنت راجل
راح تبقى حاجة... وراح يعلى شـأنك
احنا الشعب... مش المجرمين
فكر كويس
وبصّلنا تاني... وشوف احنا مين
أمك نزلت تعزي جارتها
فـ واحد قتله واحد زميلك
وبعد العزا وهي راجعة لبيتها
زلزل كيانها السؤال المخيف:
أنا ابني ممكن يعمل كده؟؟؟؟
يقتل جار ولا يحبس صديق
يبهدل ولايا في وسط الطريق
لأ مستحيل
أنا ابني أحسنله إنه يبقى قتيل
ولا يبقى قاتل لناس مظلومين
فكر كويس
وبصِّلنا تاني... وشوف احنا مين
احنا يا باشا... مش إسرائيل
ولا احنا ممدوح بيه إسماعيل
ولا احنا اللي غلينا سعر الحديد
ولا احنا اللي بعنا البلد... للبعيد
ولا احنا اللي شرَّبناك... مية وسخة
ولا احنا اللي عيِّشناك... عيشة ماسخة
ولا احنا السبب
إن انت وزمايلك... وعيلتك وأهلك
واحنا معاكو
نعيش محرومين
ففكر كويس
وبصِّلنا تاني... وشوف احنا... مين
--------------
طارق قطب
شاعر عامية مصري يعمل دبلوماسي بوزارة الخارجية أ
Like · · Share · 61622 ·
ليست هناك تعليقات:
إرسال تعليق