موقف مشابه للطريقة التي يتعامل بها الإعلام المصري مع من سرقوا و نصبوا و بلطجوا
و تواطئوا علي بلاوي رؤساء العصابة سنوات طويلة
مشهد داخلي من إستديو قناة النزاهة و الشفافية
رجل مريض يحضر الي القناة بدعو من إدارتها لكي يواجه رأس الفلول
تجلس المزة...عفواً المذيعة بين ضيفيها,,,ينظر الرجل المتهالك و كأنه تعرض للتعذيب أو ما شابه ذلك لا يستطيع أن يصلب جسده فيتكئ علي مساند الكرسي ورأسه منكسر
الفل الشهير يجلس كما الديناصور الضخم,,تعلو وجهه إبتسامة عريضة جداً-2متر تقريباً-و يركز عيناه بنشوة جامدة قوي تجاه المذيعة التي تبادله ألأبتسامات في خجل يدل علي حياء و أنها بنت ناس
تسئل المذيعة الحسناء الرجل المريض
يا حاج,,إنت كاتب هنا إن أمن الدولة لفقولك و إعتقلوا أبناءك و هتكوا عرض مراتك و طردوا بنتك و جوزها من شغلهم و بتوع المنحل أخد منك أتاوات لحد ما فلست ولم قلتلهم خلاص ماعيش,ماصدقوش و فقعوك زنمبة و إن الباشا ده منهم ,,,,و أمن الدولة قبضت عليك و قالوا شيوعي وعذبوك و بعدين رجعوا و قبضوا عليك تاني و قالوا إخوان و عذبوك و بعدين قبضوا عليك تالت و قالوا زمالكاوي و عذبوك.إنت دلوقت خايف لحسن الحزب يرجع و أمن الدولة كمان و يرجعوا يعملوا معاك نفس الحاجات الوحشة دي
النهاردة يا حاج بنستضيف سيادة الفل الشهير علشان يفهمك غلط...قصدي يفهمك حقائق الموقف
صرخ الرجل,,ياست ده اللي كان دايماً بيهددني و بياخد الفلوس,جايبينوا هنا ليه؟
المذيعة:إيه ده يا حاج؟إحنا عارفين إن إبنك مات في التحرير علشان الحرية,إزاي ياراجل إنت عايز تحجر علي رأي ألأخر؟؟؟
الفل تزداد إبتسامته و إسترخاءه و تعلو وجهه تعبيرات الشماته
الراجل المريض:ياست دا أخويا مات بالكلي و انا عندي الكبد بسبب المبيدات اللي الفل ده بيجيبها
المذيعة:لالالا,ده كلام مرسل,,,أمال الناس بقت تمنين مليون إزاي؟؟؟
المريض:ياست,التحاليل بتقول مبيدات والله
المذيعة:هاهاها,,,ياراجل قول كلام غير ده,,مبيدات إيه و كلام فارغ إيه,,,إنت بس إتأثرت بكلام العملاء و المأجورين و بتتوهم حاجات ريبة
المريض:يعني يجيبولنا المرض و يبهدلونا و يقتلوا عيالنا و جايباه هنا؟؟؟
المذيعة:إنت ياحاج قرفتنا بأم الديمقراطية,,ولما جت فرصة للديمقراطية ,تقوم تتصرف بديكتاتورية و مش عايز تسمع رأي الآخر
الراجل المريض:ياست أخر إيه و أول إيه,,ده عدو و شر و فاسد وصاخب سوابق
المذيعة:لالالا,,عيب قوي,إنتو مابتسمعوش غير نفسكو و بتعتمدوا علي الصوت العالي,شوف إنت عمال تقول إيه و سيادته محروم من فرصة سشرح وجهة نظره إزاي
الفل,يعبث بالسبحة و يتنهد و يبدو علي وجهه الحزن
الرجل:ياست,,إنت مش عارفة ده عمل إيه؟؟,,,دول خربوا البلد و خربونا إحنا و باعونا و قتلوا فينا كل حاجة كويسة,,,,حرام عليكوا
المذيعة:يا استاذ ماتنساش ده برضه مصري يعني هو يهودي؟؟,,لازم ياخدوافرصة تانية وشوف حايظبطكوا إزاي
الفل يبتسم إبتسامة أعرض من الأولانية,,,ويرفع يده الي السماء داعياً إلهه بالتوفيق
الرجل المريض يصرخ في هستيريا و يلطم وجهه و يخرج من جيبه صور أبناءه المعتقلين و إبنه الشهيد,,يسقط علي الأرض,,,يلفظ أنفاسه ألأخيرة
بعد ذلك الفقرة الإخبارية,,يظهر السباعي بتاع الطب الشرعي-ووالد مديرة مستشفي ابو الريش-ممسك بعشر ملفات,و يعلن بعد أن أقسم بإلهه عشر مرات أن يقول الحق ولا شئ إلا الحق::::::"أيها السادة,أثبتت التحاليل العلمية بالأجهزة العلمية علي يد الهيئة العلمية,وفاة
هذا الرجل نتيجة هبوط في الدورة الدموية بعد إبتلاعة للفة بانجو و ذلك بشهادة عدد كبير من ألأفرد""""و بحق الللات و العزة ما أقول هو الحق وإلا فلتسخطني الألهه فل
الموقف يثبت لنا أمور كثيرة منها
أولاً:بتوع التحرير و الثوار و الشهداء و الكلام الفارغ ده,كلهم شواذ و بتوع بانجو
ثانياً:مافيش حاجة إسمها فلول,,دول مصرين برضه,,ولازم ينزلوا الأنتخابات,,دول مصرين برضه,,,دول مصرين برضه......
ثالثاً:العيال بتوع الثورة بقي وضعهم مختلف,,دول مش مصرين,ليه؟
خرجوا علي الحاكم,,,يبقوا كفار
بياخدوا تمويلات أجنبية,,,يبقوا خونة ولا يستحقوا الجنس...عفواً الجنسية المصرية
رابعاً:لا تضربوا الديمقراطية,,يجب ألأستماع و قبول ألآخر
خامساً:سيب العجلة تمشي وبلاش تصرخ و تعطل العجلة مهما حصلك,,مايصحش تعطل مصالح أسيادك
سؤال الحلقة:::::::::ء
عمال مصر زبالة و مابيشتغلوش و مالهومش لازمة
لماذا تعطلت العجلة عندما توقفوا عن العمل؟؟؟؟
إختار أحدي الإجابات
عينهم وحشة
عملين عمل للأقتصاد المصري
شالوا لامؤخذا العدة وهم ماشين
تمنياتنا لكم بالتوفيق و الي حلقة قادمة
رضا هلال
ليست هناك تعليقات:
إرسال تعليق