العنوان الكبير قوي في الصفحات الأولي للجرايد اللي باجيبها بتقول:"هيلاري كلينتون نؤكد علي دعم أمريكا الكامل للجيش و المجلس العسكري",,!!!!!!ء
طب ده كلام كويس ولا زومبة في مصر كلها؟؟؟؟
أكيد زومبة,,وبعد كده مع التيارات الدينية,,وقبل كده نفخ في أقباط الهجر,,,و الليبرالين و لكن دائماً مع إسرائيل مهما وقفت جنب ده ولا ده
طبعاً كلنا فاهمين كل حاجة و عيال عفاريت,,,بس إيه الحل في الموقف المعقد ده؟
الحل إننا لازم نقف دايماً "إيد واحدة",في مطالباتنا بالحقوق ,ودايماً نصحصح لمصالحنا و ما نتعكش كل شوية في مجرور الفتن و البلطجة و الغش و الغلاء و الفساد المتحالف المتحد القوي بضعفنا و تهاوننا
كونوا جمعيات موازية ولكن قوية لحماية المستهلك و مطاردة الغشاشين,,,كونوا لجان شعبية عند الضرورة لصد ضربات الغدر و الخيانة,,,حسسوا القيادة إنكم موجودين علي قيد الحياة و إنكم بشر ليه طلبات و عنده مخ و كرامة,,,,بلاش نهد حيل بعض بالصراعات التافهة و ما تدوش فرصة لأي مدسوس يلعب بيكوا ولا لأي حيوان يبلطج عليكوا
إيه دخل ده بالموزَة هيلاري وأمريكا و الضغوط الدولية علي الحكومات المحلية؟؟؟؟
العلاقة تتلخص في إن الدول الكبري ممكن تضغط علي الحكومة المحلية علشان تقدم تنازلات ,لو إننا تنحنا و وقفنا نتفرج,,حايضغطوا زيادة و يعملوا اللي هم عايزينه,,,لكن و طبعاً بعد كده نلعن سانسفيل أبو الحكومة علشان قدمت تنازلات.............ء
لكن لو إننا وقفنا وقفة جامدة وقلبنا الدنيا ,حاتقدر الحكومة تقاوم الضغوط الدولية,,ماهو يا أستاذ تخيل معايا الحوار ده
أمريكا:إنت حكومة مصري,,لازم تعمل كويز مع إسرائيل
المصري:بس ياجماعة الشعب مابيحبش كده
أمريكا:إنتي ولد كداب,ماحدش قال حاجة أهو,,إنتي بس عاوز تعملي دوش’,,شعب مبسوط كتير
المصري:عليا الطلاق بيضايقوا من التنازلات دي
أمريكا:إنت إتكلم كتير,إتكلم كتير ,,تخليهم يضايقوا,و تحرضهم علينا,,هم طيبيين كتير,مطرمخين كتير,,إنت إعمل دوشة,هم يصحوا
وطبعاً علشان إحنا مابتتكلمش,مع إننا الشعب ,يعني إصحاب الملك,يبقي الحكومة مش حاتقدر تعترض,,ليه؟؟,لإنها تحت ضغط من جنب واحد بس-عالمي-و جوه مفيش نفس,,طبعاً الكفة حاتميل لناحية اللي بيضغط,,وده اللي إحنا مش واخدين بالنا منه,,,يعني برضه,الحكومات-الكويسة- بتحتاج ضغط شعبها في المواقف دي,علشان تتسند عليه و الحكومات القذرة بتحط منوم لشعوبها علشان مايخدوش بالهم واللي ياخد باله يخلصوا منه و الباقي نايم مش حايخدوا بالهم
داخلياً,,يحصل إيه لو إننا -اللي بندعي إننا كويسين-بننزل مع أي صاحب حق بيطالب بيه و هو ينزل معانا في مطالبنا؟؟؟,,,طبعاً كانت الأمور حاتكون أفضل و هايكون من الصعب علي اي بلطجية او فلول ميري او مدني معندوش ضمير يقتلوا الناس ولا يستفردوا بحد
يحصل إيه لو وقفنا مع الحكومة في الحق و وقفنالها في الباطل,,والله ألأمور كلها حاتنظبط
هو ربنا أسس الدنيا علي كده,,مش دايماً بتقولوا لا يغير الله ما بقوم حتي يغيروا مابأنفسهم!!ء
ماهو معناها كده,,لازم يبقي لينا لون و طعم وريحة و وجود و نبقي عصب ناشف قوي ,,مش بلوظة,,,الفترة الجاية دي ,,ممكن الوضع يبقي كارثة و ممكن يبقي خير و أقسم لكم بالله إنكم إنتم اللي حاتحددوا,,,ماتسبوش الإيجابية و ألأتحاد و التنظيم و الجدية حكر علي العصابات فقط
إنتم أولي بالمكارم,,أكرمكم الله و جعل لكم نورا
رضا هلالً
ليست هناك تعليقات:
إرسال تعليق