قدم ألأتراك مسلسل العشق الممنوع و هو مسلسل لم أشاهده ولكن شفت شاهدت بعض من مشاهده و كل مرة الاقي الحريم فيه مغيرين الرجالة و الناس لبعضيها
لم يغيب التلفزيون السوري عن مضمار السباق فسارع بتقديم مسلسل العشق الحرام,,والأعلان بتاعه بيشير الي أن واحد بيحب بنته او حاجة زي كده وبرضه مزز حلوة والناس لبعضيها برضه
أقترح هنا فكرة مسلسل مصري يدور في اوساط أحزابنا التي تدعي الوطنية ويعلم بيها ربنا
و كذلك الجماعات الأسلامية اللي بتعلب بالدين سياسة,,والمسيحية اللي بتلعب بالدين بزنس والليبراليا اللي بتلعب بالديمقراطية من أجل حفنة دولارات و أيضاً مرشحي الرياسة بتوع الظهور المفاجئ و ألأختفاء التكتيكي
يشتمل المسلسل علي مشاهد فاضحة للتواطئ المتعمد مع البلطجية و الحزب المنحل و أمن الدولة-بس أكيد مش الدولة المصرية-و القبض علي شوية شباب و في الناحية المقابلة من المشهد يقف عدد من البلطجية شامتين و علي الجانب يظهر ايضاً مواطنين عاديين ولكن شاء القدر أن هؤلاء المواطنيين وقفوا في الحتة الضلمة و مش شايفين كويس بس سامعين صريخ العيال بتوع النت.المواطنين مش عارفين إيه اللي بيحصل و كل شوية حد يخش عليهم و يقلهم:الثورة خربت البلد و حاتموتوا من الجوع,,,المسلمين حايحكموكوا و حا يقطعوا....إيديكوا,,,المسيحيين حايبنوا كنيسة و يهدواالجامع,,,والسادة المواطنون مرعوبون و مش عايزين يدافعوا عن نفسهم ولا حتي يعرفوا إيه اللي بيحصل بجد
فكرة المسلسل فكرة تتسم بالجراءة,,جنس,,شذوذ,,,عنف,,,غموض,,,إثارة من كل نوع و تظل النهاية مفاجأة
أقترح تسمية المسلسل ب"الحب الوسخ"",وذلك في إطار التطوير و المنافسة و الريادة
رضا هلال
ليست هناك تعليقات:
إرسال تعليق