الكثير من ألأسئلة "معبقة" في جو مصر هذه ألأيام أكتر من المعتاد,,والإجابات سهلة جداً
س.ليه البلطجة في مصر مستمرة,متزايدة,منتشرة,,و بالرغم من تأثيرها المدمر علي ألأمن القومي المصري و مع ذلك ما بيمسكوش الناس الكبيرة اللي وراه؟؟؟؟
ج.لإن اللي وراه أصابع خفية تلعب في الظلام و الحكومة في مصر طول عمرها بتخاف من الضلمة
س.ليه الأمور مظبطة في تونس و في مصر "مبعككة" أوي؟؟
ج.علشان عندهم العملية محندقة,حتي الفساد اللي كان عندهم كان محندق برضه و ريسهم كان بيشيل فلوس في البيت,لكن عندنا العملية كبيرة أوي و ريسنا و الفاملية بشيلوا فلوسهم في كل مكان بالكرة ألأرضية,,الي جانب إن ريسهم لما غار في داهية,سيطر الثوار علي الموقف,و ماحطوش ثقتهم في أي حد تبعه,,لكن هنا الثوار وثقوا في أحب مؤسسة الي قلب المصريين و أكثرها إحتراماً,,فسلمتهم تسليم يد لشفيق و صبيان حسني ألأخرين
س.ليه العالم كله بيسمح للمغتربين بتوعه بالتصويت و هم في الخارج و مصر مابتسمحش؟؟
ج.علشان ميزانية مصر لا تسمح بشحن عشرات الألاف من البلطجية الي الخارج و تحمل تكاليف سفرهم و إقامتهم و بدلاتهم باليورو و الدولار
س.ليه دايما بيهددونا بالفقر لو حاسبنا الحرامية اللي سرقونا و بيقولولنا "المستثمرين حايخافوا و يمشوا"؟
ج.الكلام ده مظبوط جداً علشان المستثمرين اللي جابهم حسني و عصابته من أقذر أنواع اللصوص الدوليين و من أشرس عصابات المافيا العالمية و طبعاً حايهربوا لو فيه كبسة
س.ليه ما سمحوش لسمير رضوان بتحقيق مشروعه الأقتصادي الإصلاحي و بعد كده رفعوا ألأسعار و زودوا الفتن و البلطجة المنظمة و ضغطوا علي الموظفين في كل حتة و سعادوا بقوا الفلول علي البقاء في أماكنهم؟؟؟؟؟
ج.علشان أي إصلاح كان حايحصل كان حايحسس الناس بعظمة الثورة و بكرامتهم و مش حايدي فرصة لصعود القوة الجديدة ولا ببقاء القوة القديمة
س.إزاي العربيات دي كلها بتتسرق و بيتصلوا بالناس ويطلبوا فلوس و يرجعلهم العربيات مع إن اللي بيكتب كلمتين و هو في بيتهم بيعرفوه و اللي بيتكلم في التليفون بيسمعوه؟؟؟؟
ج.إرجع الي إجابة السؤال ألأول
س.طب ليه كله عارف كل حاجة و مع ذلك مافيش حاجة بتتحل؟؟؟
ج.علشان السلبية و الطرمخة و الفذلكة من قبل من يثبتوننا من رجال الإعلام و الفكر و ألأحزاب و الثقافة و بيلعبوا بينا
س.طب إيه الحل؟؟؟؟؟؟؟؟؟
ج.لو إنت عارف الناس الكويسة و عارف الناس الوحشة زي مابتقول,ساعد الكويسة و حارب الوحشة علي قد ماتقدر,,بالظبط زي الناس الوحشة مابتعمل,بيحاربوك و بيساعدوا بعض
رضا هلال
ليست هناك تعليقات:
إرسال تعليق