خبر أحزني و هو القبض علي شاب مسيحي لأنه كتب شتائم علي الدين ألإسلامي و هذا من شأنه إثارة الفتن(خصوصاً و إننا لسه قدامنا كتير علي ما نشفي من أمراض حسني اللي دسها زي ألألغام في كل حتة),و اللي أحزني أمرين
ألأول:إن فيه ناس زي الشاب ده شربه المقلب و صدقوا إن المشكلة مشكلة إسلام و مسيحية
مش لعب قذر و ضرب في أي محترم في مصر بغض النظر عن دينه
ثانياً:إن التعامل مع اللي بيكتب كلا م مؤذي أو بيضرب بؤيين في جلسة ما أو علي منبر مسجد
بيعتقل و بياخد حكم,,ما كنت أتمناه ان يتم مناقشته من قبل أهل العلم من الطرفين و إفهامه ما
لم يكن يفهمه,,,لكن إعتقاله و سجنه يعتبران دليل علي عدم وجود عقول يمكن أن تتعامل مع هذا النوع من الموقف
* ******** *
الكاتب محمد فتحي بجريدة التحرير النهاردة,لفت نظر الناس الي نقطتين
الأولي:مظاهرات ألأمناء أمام الداخلية,,,ينفع يضربوهم أو يدهسوهم؟؟
الثانية:الشيخ الحويني يستأجر عدد 9 محامين من أجل الدفاع عنه في دعوي المفتي ضده
و هنا محمد يذكرنا بأن الحويني يحرم و بشدة المحاماة و دخول كلية الحقوق أصلاً
و أنا أذكركم أيضاً بإن السلفين حرموا الثورة و بعد كده ركبوها,,وحرموا الديمقراطية و مع ذلك بعتوا شبابهم أوربا تبع منحة أوربية لتعلم الديمقراطية و إدارة ألأحزاب,,و.....اللي تغلبه إلعبه
* ********* *
البيان علي المعلم,,حصل في الجامعة,,إعادة تظبيط اللوائح لتجنب الفضائح,,و التمكن من تمكين رئيس الجامعة ملك ملوك الفلول بالتعليم العالي و كله بالأنتخبات و فتشني فتش و,,
أحلي من الشرف مفيش,,وبالنسبة لإنتخبات مجلسي الشعب و الشوري و الرياسة,,فكل التجهيزات متوفرة و سمعة محلاتنا معروفة من زمان و شرفونا تجدوا ما يضركم
* ********** *
لايزال هناك أصوات نحيب تنتشر بين عدد من الصحافيين علي القذافي و ألأخ البكري الفل المتحول و اللاعب علي الحبل و غيره من الشرفاء ,,الخ
و أتسأل,,هم ليه ماكانوش بيعيطوا علي الشعب الليبي اللي بيتعذب و يغتصب و بيقتل في حفلات ألأعدام الشهرية بإستاد بنغازي 42سنة,,وليه ماكانوش بيعيطوا علي حال ليبيا الغنية المنهوبة المتخلفة,,,طب ليه ما كانوش بيعيطوا علي 40الف شهيد و أكتر من ميت ألف مصاب و معوق و أكتر من 2000 فتاة تم إغتصابهم و كل ده أثناء أحداث الثورة فقط؟؟؟
طب هم فاكرين الفنابل اللي ضربها كلاب القذافي في محطة مصر و بوستة العتبة أواخر السبعينات و تسببت في قتل سيدة و اطفالها و شوية ناس غلابة؟؟؟؟
طب عساكرنا اللي قتلهم علي حدود السلوم أواخر السبعينات برضه؟؟؟
طب هل من حق أي جحش ينهق في وش المظلومين و يقول"لالالا عيب أوي ياجماعة الحاجات الوحشة اللي بتعملوها دي"",ولما كانوا بيتعذبوا و بيغتصبوا هم وأهاليهم كان نفس الجحش ده
مشغول بالعليقة القذافية و الهداية السويسرية؟؟؟؟
طبعاً ما ينفعش
* ********* *
حاجات كتير ماتنفعش,,بس ليه بيعملوها بجراءة شديدة؟؟؟,,طبعاً لإن فيه إحفاء للحقائق و البلاوي بالقدر الذي يسمح للمجرم بالتواجد الرسمي و التطبيع معاه و الحجة إيه؟؟,,بلاش نتكلم في الماضي و نضيع وقتنا علشان العجلة و الأستقرار و لحسن الناس الوحشين يعملوا فينا حاجات وحشة........,و بوس إيد عمو يا واد
رضا هلال
ليست هناك تعليقات:
إرسال تعليق